గాంధీ జయంతి సందర్భంగా తెలుగు బాక్సాఫీస్ వద్ద అరుదైన రద్దీ నెలకొంది. అక్టోబర్ 2, శుక్రవారం నాడు దాదాపు 8 చిత్రాలు ఒకేరోజు థియేటర్లలోకి వస్తున్నాయి.
ముందువరుసలో మూడు చిత్రాలు ఉన్నాయి. సందీప్ కిషన్ నటించిన ‘సిగ్మా’ యాక్షన్ డ్రామాగా వస్తోంది. ఫహద్ ఫాజిల్ ‘డోంట్ ట్రబుల్ ది ట్రబుల్’ విభిన్నమైన ఫాంటసీ అడ్వెంచర్‌గా ప్రేక్షకుల దృష్టిని ఆకర్షిస్తోంది. ఈ చిత్రాన్ని రాజమౌళి తనయుడు కార్తికేయ నిర్మించడం విశేషం. ప్రీ-రిలీజ్ ఈవెంట్‌కు ఎన్టీఆర్ హాజరుకావడంతో ఈ సినిమాపై హైప్ ఒక్కసారిగా పెరిగింది. బాలీవుడ్ నుంచి అజయ్ దేవగణ్ ‘దృశ్యం: ది కన్‌క్లూజన్’ కూడా అదే రోజు విడుదలవుతోంది.
చిన్న బడ్జెట్ చిత్రాలు కూడా బరిలో ఉన్నాయి. విక్రమ్ సహిదేవ్ ‘అనకాపల్లి’, హర్ష్ రోషన్-నక్షత్రల ‘తెల్ల కాగితం’, ‘తత్వం’, ‘డోరతీ’, ఆది సాయికుమార్ ‘సబ్ ఇన్‌స్పెక్టర్ యుగంధర్’ అదే రోజు ప్రేక్షకుల ముందుకు వస్తున్నాయి. అక్టోబర్ 1న నివిన్ పౌలీ ‘సంచారి’ విడుదలైంది.
అయితే ట్రేడ్ వర్గాల్లో ఆందోళన కూడా ఉంది. అడ్వాన్స్ బుకింగ్స్ అంతంత మాత్రంగానే ఉన్నాయని, దాదాపు ప్రతి సినిమా ఫస్ట్ డే టాక్‌పైనే ఆధారపడాల్సి ఉంటుందని ట్రేడ్ నిపుణులు అంటున్నారు.
పండుగ వీకెండ్ కావడంతో కుటుంబ ప్రేక్షకులు థియేటర్లకు తరలివచ్చే అవకాశం ఉంది. ఏ సినిమా మంచి టాక్ తెచ్చుకుంటే అదే ఈ రద్దీలో నిలుస్తుంది. శుక్రవారం ఉదయం షోలతోనే తొలి చిత్రం స్పష్టమవుతుంది.